Mandalas 8 - (1716 verses)
Mandala 8 · Verse 1
pra yad vas triṣṭubham iṣam maruto vipro akṣarat | vi parvateṣu rājatha
Mandala 8 · Verse 2
yad aṅga taviṣīyavo yāmaṁ śubhrā acidhvam | ni parvatā ahāsata
Mandala 8 · Verse 3
ud īrayanta vāyubhir vāśrāsaḥ pṛśnimātaraḥ | dhukṣanta pipyuṣīm iṣam
Mandala 8 · Verse 4
vapanti maruto miham pra vepayanti parvatān | yad yāmaṁ yānti vāyubhiḥ
Mandala 8 · Verse 5
ni yad yāmāya vo girir ni sindhavo vidharmaṇe | mahe śuṣmāya yemire
Mandala 8 · Verse 6
yuṣmām̐ u naktam ūtaye yuṣmān divā havāmahe | yuṣmān prayaty adhvare
Mandala 8 · Verse 7
ud u tye aruṇapsavaś citrā yāmebhir īrate | vāśrā adhi ṣṇunā divaḥ
Mandala 8 · Verse 8
sṛjanti raśmim ojasā panthāṁ sūryāya yātave | te bhānubhir vi tasthire
Mandala 8 · Verse 9
imām me maruto giram imaṁ stomam ṛbhukṣaṇaḥ | imam me vanatā havam
Mandala 8 · Verse 10
trīṇi sarāṁsi pṛśnayo duduhre vajriṇe madhu | utsaṁ kavandham udriṇam
Mandala 8 · Verse 11
maruto yad dha vo divaḥ sumnāyanto havāmahe | ā tū na upa gantana
Mandala 8 · Verse 12
yūyaṁ hi ṣṭhā sudānavo rudrā ṛbhukṣaṇo dame | uta pracetaso made
Mandala 8 · Verse 13
ā no rayim madacyutam purukṣuṁ viśvadhāyasam | iyartā maruto divaḥ
Mandala 8 · Verse 14
adhīva yad girīṇāṁ yāmaṁ śubhrā acidhvam | suvānair mandadhva indubhiḥ
Mandala 8 · Verse 15
etāvataś cid eṣāṁ sumnam bhikṣeta martyaḥ | adābhyasya manmabhiḥ
Mandala 8 · Verse 16
ye drapsā iva rodasī dhamanty anu vṛṣṭibhiḥ | utsaṁ duhanto akṣitam
Mandala 8 · Verse 17
ud u svānebhir īrata ud rathair ud u vāyubhiḥ | ut stomaiḥ pṛśnimātaraḥ
Mandala 8 · Verse 18
yenāva turvaśaṁ yaduṁ yena kaṇvaṁ dhanaspṛtam | rāye su tasya dhīmahi
Mandala 8 · Verse 19
imā u vaḥ sudānavo ghṛtaṁ na pipyuṣīr iṣaḥ | vardhān kāṇvasya manmabhiḥ
Mandala 8 · Verse 20
kva nūnaṁ sudānavo madathā vṛktabarhiṣaḥ | brahmā ko vaḥ saparyati
Mandala 8 · Verse 21
nahi ṣma yad dha vaḥ purā stomebhir vṛktabarhiṣaḥ | śardhām̐ ṛtasya jinvatha
Mandala 8 · Verse 22
sam u tye mahatīr apaḥ saṁ kṣoṇī sam u sūryam | saṁ vajram parvaśo dadhuḥ
Mandala 8 · Verse 23
vi vṛtram parvaśo yayur vi parvatām̐ arājinaḥ | cakrāṇā vṛṣṇi pauṁsyam
Mandala 8 · Verse 24
anu tritasya yudhyataḥ śuṣmam āvann uta kratum | anv indraṁ vṛtratūrye
Mandala 8 · Verse 25
vidyuddhastā abhidyavaḥ śiprāḥ śīrṣan hiraṇyayīḥ | śubhrā vy añjata śriye
Mandala 8 · Verse 26
uśanā yat parāvata ukṣṇo randhram ayātana | dyaur na cakradad bhiyā
Mandala 8 · Verse 27
ā no makhasya dāvane 'śvair hiraṇyapāṇibhiḥ | devāsa upa gantana
Mandala 8 · Verse 28
yad eṣām pṛṣatī rathe praṣṭir vahati rohitaḥ | yānti śubhrā riṇann apaḥ
Mandala 8 · Verse 29
suṣome śaryaṇāvaty ārjīke pastyāvati | yayur nicakrayā naraḥ
Mandala 8 · Verse 30
kadā gacchātha maruta itthā vipraṁ havamānam | mārḍīkebhir nādhamānam
Mandala 8 · Verse 31
kad dha nūnaṁ kadhapriyo yad indram ajahātana | ko vaḥ sakhitva ohate
Mandala 8 · Verse 32
saho ṣu ṇo vajrahastaiḥ kaṇvāso agnim marudbhiḥ | stuṣe hiraṇyavāśībhiḥ
Mandala 8 · Verse 33
o ṣu vṛṣṇaḥ prayajyūn ā navyase suvitāya | vavṛtyāṁ citravājān
Mandala 8 · Verse 34
girayaś cin ni jihate parśānāso manyamānāḥ | parvatāś cin ni yemire
Mandala 8 · Verse 35
ākṣṇayāvāno vahanty antarikṣeṇa patataḥ | dhātāraḥ stuvate vayaḥ
Mandala 8 · Verse 36
agnir hi jāni pūrvyaś chando na sūro arciṣā | te bhānubhir vi tasthire
Mandala 8 · Verse 1
ā no viśvābhir ūtibhir aśvinā gacchataṁ yuvam | dasrā hiraṇyavartanī pibataṁ somyam madhu
Mandala 8 · Verse 2
ā nūnaṁ yātam aśvinā rathena sūryatvacā | bhujī hiraṇyapeśasā kavī gambhīracetasā
Mandala 8 · Verse 3
ā yātaṁ nahuṣas pary āntarikṣāt suvṛktibhiḥ | pibātho aśvinā madhu kaṇvānāṁ savane sutam
Mandala 8 · Verse 4
ā no yātaṁ divas pary āntarikṣād adhapriyā | putraḥ kaṇvasya vām iha suṣāva somyam madhu
Mandala 8 · Verse 5
ā no yātam upaśruty aśvinā somapītaye | svāhā stomasya vardhanā pra kavī dhītibhir narā
Mandala 8 · Verse 6
yac cid dhi vām pura ṛṣayo juhūre 'vase narā | ā yātam aśvinā gatam upemāṁ suṣṭutim mama
Mandala 8 · Verse 7
divaś cid rocanād adhy ā no gantaṁ svarvidā | dhībhir vatsapracetasā stomebhir havanaśrutā
Mandala 8 · Verse 8
kim anye pary āsate 'smat stomebhir aśvinā | putraḥ kaṇvasya vām ṛṣir gīrbhir vatso avīvṛdhat
Mandala 8 · Verse 9
ā vāṁ vipra ihāvase 'hvat stomebhir aśvinā | ariprā vṛtrahantamā tā no bhūtam mayobhuvā
Mandala 8 · Verse 10
ā yad vāṁ yoṣaṇā ratham atiṣṭhad vājinīvasū | viśvāny aśvinā yuvam pra dhītāny agacchatam
Mandala 8 · Verse 11
ataḥ sahasranirṇijā rathenā yātam aśvinā | vatso vām madhumad vaco 'śaṁsīt kāvyaḥ kaviḥ
Mandala 8 · Verse 12
purumandrā purūvasū manotarā rayīṇām | stomam me aśvināv imam abhi vahnī anūṣātām
Mandala 8 · Verse 13
ā no viśvāny aśvinā dhattaṁ rādhāṁsy ahrayā | kṛtaṁ na ṛtviyāvato mā no rīradhataṁ nide
Mandala 8 · Verse 14
yan nāsatyā parāvati yad vā stho adhy ambare | ataḥ sahasranirṇijā rathenā yātam aśvinā
Mandala 8 · Verse 15
yo vāṁ nāsatyāv ṛṣir gīrbhir vatso avīvṛdhat | tasmai sahasranirṇijam iṣaṁ dhattaṁ ghṛtaścutam
Mandala 8 · Verse 16
prāsmā ūrjaṁ ghṛtaścutam aśvinā yacchataṁ yuvam | yo vāṁ sumnāya tuṣṭavad vasūyād dānunas patī
Mandala 8 · Verse 17
ā no gantaṁ riśādasemaṁ stomam purubhujā | kṛtaṁ naḥ suśriyo naremā dātam abhiṣṭaye
Mandala 8 · Verse 18
ā vāṁ viśvābhir ūtibhiḥ priyamedhā ahūṣata | rājantāv adhvarāṇām aśvinā yāmahūtiṣu
Mandala 8 · Verse 19
ā no gantam mayobhuvāśvinā śambhuvā yuvam | yo vāṁ vipanyū dhītibhir gīrbhir vatso avīvṛdhat
Mandala 8 · Verse 20
yābhiḥ kaṇvam medhātithiṁ yābhir vaśaṁ daśavrajam | yābhir gośaryam āvataṁ tābhir no 'vataṁ narā
Mandala 8 · Verse 21
yābhir narā trasadasyum āvataṁ kṛtvye dhane | tābhiḥ ṣv a1smām̐ aśvinā prāvataṁ vājasātaye
Mandala 8 · Verse 22
pra vāṁ stomāḥ suvṛktayo giro vardhantv aśvinā | purutrā vṛtrahantamā tā no bhūtam puruspṛhā
Mandala 8 · Verse 23
trīṇi padāny aśvinor āviḥ sānti guhā paraḥ | kavī ṛtasya patmabhir arvāg jīvebhyas pari
Mandala 8 · Verse 1
ā nūnam aśvinā yuvaṁ vatsasya gantam avase | prāsmai yacchatam avṛkam pṛthu cchardir yuyutaṁ yā arātayaḥ
Mandala 8 · Verse 2
yad antarikṣe yad divi yat pañca mānuṣām̐ anu | nṛmṇaṁ tad dhattam aśvinā
Mandala 8 · Verse 3
ye vāṁ daṁsāṁsy aśvinā viprāsaḥ parimāmṛśuḥ | evet kāṇvasya bodhatam
Mandala 8 · Verse 4
ayaṁ vāṁ gharmo aśvinā stomena pari ṣicyate | ayaṁ somo madhumān vājinīvasū yena vṛtraṁ ciketathaḥ
Mandala 8 · Verse 5
yad apsu yad vanaspatau yad oṣadhīṣu purudaṁsasā kṛtam | tena māviṣṭam aśvinā
Mandala 8 · Verse 6
yan nāsatyā bhuraṇyatho yad vā deva bhiṣajyathaḥ | ayaṁ vāṁ vatso matibhir na vindhate haviṣmantaṁ hi gacchathaḥ
Mandala 8 · Verse 7
ā nūnam aśvinor ṛṣiḥ stomaṁ ciketa vāmayā | ā somam madhumattamaṁ gharmaṁ siñcād atharvaṇi
Mandala 8 · Verse 8
ā nūnaṁ raghuvartaniṁ rathaṁ tiṣṭhātho aśvinā | ā vāṁ stomā ime mama nabho na cucyavīrata
Mandala 8 · Verse 9
yad adya vāṁ nāsatyokthair ācucyuvīmahi | yad vā vāṇībhir aśvinevet kāṇvasya bodhatam
Mandala 8 · Verse 10
yad vāṁ kakṣīvām̐ uta yad vyaśva ṛṣir yad vāṁ dīrghatamā juhāva | pṛthī yad vāṁ vainyaḥ sādaneṣv eved ato aśvinā cetayethām
Mandala 8 · Verse 11
yātaṁ chardiṣpā uta naḥ paraspā bhūtaṁ jagatpā uta nas tanūpā | vartis tokāya tanayāya yātam
Mandala 8 · Verse 12
yad indreṇa sarathaṁ yātho aśvinā yad vā vāyunā bhavathaḥ samokasā | yad ādityebhir ṛbhubhiḥ sajoṣasā yad vā viṣṇor vikramaṇeṣu tiṣṭhathaḥ
Mandala 8 · Verse 13
yad adyāśvināv ahaṁ huveya vājasātaye | yat pṛtsu turvaṇe sahas tac chreṣṭham aśvinor avaḥ
Mandala 8 · Verse 14
ā nūnaṁ yātam aśvinemā havyāni vāṁ hitā | ime somāso adhi turvaśe yadāv ime kaṇveṣu vām atha
Mandala 8 · Verse 15
yan nāsatyā parāke arvāke asti bheṣajam | tena nūnaṁ vimadāya pracetasā chardir vatsāya yacchatam
Mandala 8 · Verse 16
abhutsy u pra devyā sākaṁ vācāham aśvinoḥ | vy āvar devy ā matiṁ vi rātim martyebhyaḥ
Mandala 8 · Verse 17
pra bodhayoṣo aśvinā pra devi sūnṛte mahi | pra yajñahotar ānuṣak pra madāya śravo bṛhat
Mandala 8 · Verse 18
yad uṣo yāsi bhānunā saṁ sūryeṇa rocase | ā hāyam aśvino ratho vartir yāti nṛpāyyam
Mandala 8 · Verse 19
yad āpītāso aṁśavo gāvo na duhra ūdhabhiḥ | yad vā vāṇīr anūṣata pra devayanto aśvinā
Mandala 8 · Verse 20
pra dyumnāya pra śavase pra nṛṣāhyāya śarmaṇe | pra dakṣāya pracetasā
Mandala 8 · Verse 21
yan nūnaṁ dhībhir aśvinā pitur yonā niṣīdathaḥ | yad vā sumnebhir ukthyā
Mandala 8 · Verse 1
yat stho dīrghaprasadmani yad vādo rocane divaḥ | yad vā samudre adhy ākṛte gṛhe 'ta ā yātam aśvinā
Mandala 8 · Verse 2
yad vā yajñam manave sammimikṣathur evet kāṇvasya bodhatam | bṛhaspatiṁ viśvān devām̐ ahaṁ huva indrāviṣṇū aśvināv āśuheṣasā
Mandala 8 · Verse 3
tyā nv a1śvinā huve sudaṁsasā gṛbhe kṛtā | yayor asti pra ṇaḥ sakhyaṁ deveṣv adhy āpyam
Mandala 8 · Verse 4
yayor adhi pra yajñā asūre santi sūrayaḥ | tā yajñasyādhvarasya pracetasā svadhābhir yā pibataḥ somyam madhu
Mandala 8 · Verse 5
yad adyāśvināv apāg yat prāk stho vājinīvasū | yad druhyavy anavi turvaśe yadau huve vām atha mā gatam
Mandala 8 · Verse 6
yad antarikṣe patathaḥ purubhujā yad veme rodasī anu | yad vā svadhābhir adhitiṣṭhatho ratham ata ā yātam aśvinā
Mandala 8 · Verse 1
tvam agne vratapā asi deva ā martyeṣv ā | tvaṁ yajñeṣv īḍyaḥ
Mandala 8 · Verse 2
tvam asi praśasyo vidatheṣu sahantya | agne rathīr adhvarāṇām
Mandala 8 · Verse 3
sa tvam asmad apa dviṣo yuyodhi jātavedaḥ | adevīr agne arātīḥ
Mandala 8 · Verse 4
anti cit santam aha yajñam martasya ripoḥ | nopa veṣi jātavedaḥ
Mandala 8 · Verse 5
martā amartyasya te bhūri nāma manāmahe | viprāso jātavedasaḥ
Mandala 8 · Verse 6
vipraṁ viprāso 'vase devam martāsa ūtaye | agniṁ gīrbhir havāmahe
Mandala 8 · Verse 7
ā te vatso mano yamat paramāc cit sadhasthāt | agne tvāṁkāmayā girā
Mandala 8 · Verse 8
purutrā hi sadṛṅṅ asi viśo viśvā anu prabhuḥ | samatsu tvā havāmahe
Mandala 8 · Verse 9
samatsv agnim avase vājayanto havāmahe | vājeṣu citrarādhasam
Mandala 8 · Verse 10
pratno hi kam īḍyo adhvareṣu sanāc ca hotā navyaś ca satsi | svāṁ cāgne tanvam piprayasvāsmabhyaṁ ca saubhagam ā yajasva
Mandala 8 · Verse 1
ya indra somapātamo madaḥ śaviṣṭha cetati | yenā haṁsi ny a1triṇaṁ tam īmahe
Mandala 8 · Verse 2
yenā daśagvam adhriguṁ vepayantaṁ svarṇaram | yenā samudram āvithā tam īmahe
Mandala 8 · Verse 3
yena sindhum mahīr apo rathām̐ iva pracodayaḥ | panthām ṛtasya yātave tam īmahe
Mandala 8 · Verse 4
imaṁ stomam abhiṣṭaye ghṛtaṁ na pūtam adrivaḥ | yenā nu sadya ojasā vavakṣitha
Mandala 8 · Verse 5
imaṁ juṣasva girvaṇaḥ samudra iva pinvate | indra viśvābhir ūtibhir vavakṣitha
Mandala 8 · Verse 6
yo no devaḥ parāvataḥ sakhitvanāya māmahe | divo na vṛṣṭim prathayan vavakṣitha
Mandala 8 · Verse 7
vavakṣur asya ketava uta vajro gabhastyoḥ | yat sūryo na rodasī avardhayat
Mandala 8 · Verse 8
yadi pravṛddha satpate sahasram mahiṣām̐ aghaḥ | ād it ta indriyam mahi pra vāvṛdhe
Mandala 8 · Verse 9
indraḥ sūryasya raśmibhir ny arśasānam oṣati | agnir vaneva sāsahiḥ pra vāvṛdhe
Mandala 8 · Verse 10
iyaṁ ta ṛtviyāvatī dhītir eti navīyasī | saparyantī purupriyā mimīta it
Mandala 8 · Verse 11
garbho yajñasya devayuḥ kratum punīta ānuṣak | stomair indrasya vāvṛdhe mimīta it
Mandala 8 · Verse 12
sanir mitrasya papratha indraḥ somasya pītaye | prācī vāśīva sunvate mimīta it
Mandala 8 · Verse 13
yaṁ viprā ukthavāhaso 'bhipramandur āyavaḥ | ghṛtaṁ na pipya āsany ṛtasya yat
Mandala 8 · Verse 14
uta svarāje aditiḥ stomam indrāya jījanat | purupraśastam ūtaya ṛtasya yat
Mandala 8 · Verse 15
abhi vahnaya ūtaye 'nūṣata praśastaye | na deva vivratā harī ṛtasya yat
Mandala 8 · Verse 16
yat somam indra viṣṇavi yad vā gha trita āptye | yad vā marutsu mandase sam indubhiḥ
Mandala 8 · Verse 17
yad vā śakra parāvati samudre adhi mandase | asmākam it sute raṇā sam indubhiḥ
Mandala 8 · Verse 18
yad vāsi sunvato vṛdho yajamānasya satpate | ukthe vā yasya raṇyasi sam indubhiḥ
Mandala 8 · Verse 19
devaṁ-devaṁ vo 'vasa indram-indraṁ gṛṇīṣaṇi | adhā yajñāya turvaṇe vy ānaśuḥ
Mandala 8 · Verse 20
yajñebhir yajñavāhasaṁ somebhiḥ somapātamam | hotrābhir indraṁ vāvṛdhur vy ānaśuḥ
Mandala 8 · Verse 21
mahīr asya praṇītayaḥ pūrvīr uta praśastayaḥ | viśvā vasūni dāśuṣe vy ānaśuḥ
Mandala 8 · Verse 22
indraṁ vṛtrāya hantave devāso dadhire puraḥ | indraṁ vāṇīr anūṣatā sam ojase
Mandala 8 · Verse 23
mahāntam mahinā vayaṁ stomebhir havanaśrutam | arkair abhi pra ṇonumaḥ sam ojase
Mandala 8 · Verse 24
na yaṁ vivikto rodasī nāntarikṣāṇi vajriṇam | amād id asya titviṣe sam ojasaḥ
Mandala 8 · Verse 25
yad indra pṛtanājye devās tvā dadhire puraḥ | ād it te haryatā harī vavakṣatuḥ
Mandala 8 · Verse 26
yadā vṛtraṁ nadīvṛtaṁ śavasā vajrinn avadhīḥ | ād it te haryatā harī vavakṣatuḥ
Mandala 8 · Verse 27
yadā te viṣṇur ojasā trīṇi padā vicakrame | ād it te haryatā harī vavakṣatuḥ
Mandala 8 · Verse 28
yadā te haryatā harī vāvṛdhāte dive-dive | ād it te viśvā bhuvanāni yemire
Mandala 8 · Verse 29
yadā te mārutīr viśas tubhyam indra niyemire | ād it te viśvā bhuvanāni yemire
Mandala 8 · Verse 30
yadā sūryam amuṁ divi śukraṁ jyotir adhārayaḥ | ād it te viśvā bhuvanāni yemire
Mandala 8 · Verse 31
imāṁ ta indra suṣṭutiṁ vipra iyarti dhītibhiḥ | jāmim padeva pipratīm prādhvare
Mandala 8 · Verse 32
yad asya dhāmani priye samīcīnāso asvaran | nābhā yajñasya dohanā prādhvare
Mandala 8 · Verse 33
suvīryaṁ svaśvyaṁ sugavyam indra daddhi naḥ | hoteva pūrvacittaye prādhvare
Mandala 8 · Verse 1
indraḥ suteṣu someṣu kratum punīta ukthyam | vide vṛdhasya dakṣaso mahān hi ṣaḥ
Mandala 8 · Verse 2
sa prathame vyomani devānāṁ sadane vṛdhaḥ | supāraḥ suśravastamaḥ sam apsujit
Mandala 8 · Verse 3
tam ahve vājasātaya indram bharāya śuṣmiṇam | bhavā naḥ sumne antamaḥ sakhā vṛdhe
Mandala 8 · Verse 4
iyaṁ ta indra girvaṇo rātiḥ kṣarati sunvataḥ | mandāno asya barhiṣo vi rājasi
Mandala 8 · Verse 5
nūnaṁ tad indra daddhi no yat tvā sunvanta īmahe | rayiṁ naś citram ā bharā svarvidam
Mandala 8 · Verse 6
stotā yat te vicarṣaṇir atipraśardhayad giraḥ | vayā ivānu rohate juṣanta yat
Mandala 8 · Verse 7
pratnavaj janayā giraḥ śṛṇudhī jaritur havam | made-made vavakṣithā sukṛtvane
Mandala 8 · Verse 8
krīḻanty asya sūnṛtā āpo na pravatā yatīḥ | ayā dhiyā ya ucyate patir divaḥ
Mandala 8 · Verse 9
uto patir ya ucyate kṛṣṭīnām eka id vaśī | namovṛdhair avasyubhiḥ sute raṇa
Mandala 8 · Verse 10
stuhi śrutaṁ vipaścitaṁ harī yasya prasakṣiṇā | gantārā dāśuṣo gṛhaṁ namasvinaḥ
Mandala 8 · Verse 11
tūtujāno mahemate 'śvebhiḥ pruṣitapsubhiḥ | ā yāhi yajñam āśubhiḥ śam id dhi te
Mandala 8 · Verse 12
indra śaviṣṭha satpate rayiṁ gṛṇatsu dhāraya | śravaḥ sūribhyo amṛtaṁ vasutvanam
Mandala 8 · Verse 13
have tvā sūra udite have madhyaṁdine divaḥ | juṣāṇa indra saptibhir na ā gahi
Mandala 8 · Verse 14
ā tū gahi pra tu drava matsvā sutasya gomataḥ | tantuṁ tanuṣva pūrvyaṁ yathā vide
Mandala 8 · Verse 15
yac chakrāsi parāvati yad arvāvati vṛtrahan | yad vā samudre andhaso 'vited asi
Mandala 8 · Verse 16
indraṁ vardhantu no gira indraṁ sutāsa indavaḥ | indre haviṣmatīr viśo arāṇiṣuḥ
Mandala 8 · Verse 17
tam id viprā avasyavaḥ pravatvatībhir ūtibhiḥ | indraṁ kṣoṇīr avardhayan vayā iva
Mandala 8 · Verse 18
trikadrukeṣu cetanaṁ devāso yajñam atnata | tam id vardhantu no giraḥ sadāvṛdham
Mandala 8 · Verse 19
stotā yat te anuvrata ukthāny ṛtuthā dadhe | śuciḥ pāvaka ucyate so adbhutaḥ
Mandala 8 · Verse 20
tad id rudrasya cetati yahvam pratneṣu dhāmasu | mano yatrā vi tad dadhur vicetasaḥ
Mandala 8 · Verse 21
yadi me sakhyam āvara imasya pāhy andhasaḥ | yena viśvā ati dviṣo atārima
Mandala 8 · Verse 22
kadā ta indra girvaṇaḥ stotā bhavāti śaṁtamaḥ | kadā no gavye aśvye vasau dadhaḥ
Mandala 8 · Verse 23
uta te suṣṭutā harī vṛṣaṇā vahato ratham | ajuryasya madintamaṁ yam īmahe
Mandala 8 · Verse 24
tam īmahe puruṣṭutaṁ yahvam pratnābhir ūtibhiḥ | ni barhiṣi priye sadad adha dvitā
Mandala 8 · Verse 25
vardhasvā su puruṣṭuta ṛṣiṣṭutābhir ūtibhiḥ | dhukṣasva pipyuṣīm iṣam avā ca naḥ
Mandala 8 · Verse 26
indra tvam avited asītthā stuvato adrivaḥ | ṛtād iyarmi te dhiyam manoyujam
Mandala 8 · Verse 27
iha tyā sadhamādyā yujānaḥ somapītaye | harī indra pratadvasū abhi svara
Mandala 8 · Verse 28
abhi svarantu ye tava rudrāsaḥ sakṣata śriyam | uto marutvatīr viśo abhi prayaḥ
Mandala 8 · Verse 29
imā asya pratūrtayaḥ padaṁ juṣanta yad divi | nābhā yajñasya saṁ dadhur yathā vide
Mandala 8 · Verse 30
ayaṁ dīrghāya cakṣase prāci prayaty adhvare | mimīte yajñam ānuṣag vicakṣya
Mandala 8 · Verse 31
vṛṣāyam indra te ratha uto te vṛṣaṇā harī | vṛṣā tvaṁ śatakrato vṛṣā havaḥ
Mandala 8 · Verse 32
vṛṣā grāvā vṛṣā mado vṛṣā somo ayaṁ sutaḥ | vṛṣā yajño yam invasi vṛṣā havaḥ
Mandala 8 · Verse 33
vṛṣā tvā vṛṣaṇaṁ huve vajriñ citrābhir ūtibhiḥ | vāvantha hi pratiṣṭutiṁ vṛṣā havaḥ
Mandala 8 · Verse 1
yad indrāhaṁ yathā tvam īśīya vasva eka it | stotā me goṣakhā syāt
Mandala 8 · Verse 2
śikṣeyam asmai ditseyaṁ śacīpate manīṣiṇe | yad ahaṁ gopatiḥ syām
Mandala 8 · Verse 3
dhenuṣ ṭa indra sūnṛtā yajamānāya sunvate | gām aśvam pipyuṣī duhe
Mandala 8 · Verse 4
na te vartāsti rādhasa indra devo na martyaḥ | yad ditsasi stuto magham
Mandala 8 · Verse 5
yajña indram avardhayad yad bhūmiṁ vy avartayat | cakrāṇa opaśaṁ divi
Mandala 8 · Verse 6
vāvṛdhānasya te vayaṁ viśvā dhanāni jigyuṣaḥ | ūtim indrā vṛṇīmahe
Mandala 8 · Verse 7
vy a1ntarikṣam atiran made somasya rocanā | indro yad abhinad valam
Mandala 8 · Verse 8
ud gā ājad aṅgirobhya āviṣ kṛṇvan guhā satīḥ | arvāñcaṁ nunude valam
Mandala 8 · Verse 9
indreṇa rocanā divo dṛḻhāni dṛṁhitāni ca | sthirāṇi na parāṇude
Mandala 8 · Verse 10
apām ūrmir madann iva stoma indrājirāyate | vi te madā arājiṣuḥ
Mandala 8 · Verse 11
tvaṁ hi stomavardhana indrāsy ukthavardhanaḥ | stotṝṇām uta bhadrakṛt
Mandala 8 · Verse 12
indram it keśinā harī somapeyāya vakṣataḥ | upa yajñaṁ surādhasam
Mandala 8 · Verse 13
apām phenena namuceḥ śira indrod avartayaḥ | viśvā yad ajayaḥ spṛdhaḥ
Mandala 8 · Verse 14
māyābhir utsisṛpsata indra dyām ārurukṣataḥ | ava dasyūm̐r adhūnuthāḥ
Mandala 8 · Verse 15
asunvām indra saṁsadaṁ viṣūcīṁ vy anāśayaḥ | somapā uttaro bhavan
Mandala 8 · Verse 1
tam v abhi pra gāyata puruhūtam puruṣṭutam | indraṁ gīrbhis taviṣam ā vivāsata
Mandala 8 · Verse 2
yasya dvibarhaso bṛhat saho dādhāra rodasī | girīm̐r ajrām̐ apaḥ svar vṛṣatvanā
Mandala 8 · Verse 3
sa rājasi puruṣṭutam̐ eko vṛtrāṇi jighnase | indra jaitrā śravasyā ca yantave
Mandala 8 · Verse 4
taṁ te madaṁ gṛṇīmasi vṛṣaṇam pṛtsu sāsahim | u lokakṛtnum adrivo hariśriyam
Mandala 8 · Verse 5
yena jyotīṁṣy āyave manave ca viveditha | mandāno asya barhiṣo vi rājasi
Mandala 8 · Verse 6
tad adyā cit ta ukthino 'nu ṣṭuvanti pūrvathā | vṛṣapatnīr apo jayā dive-dive
Mandala 8 · Verse 7
tava tyad indriyam bṛhat tava śuṣmam uta kratum | vajraṁ śiśāti dhiṣaṇā vareṇyam
Mandala 8 · Verse 8
tava dyaur indra pauṁsyam pṛthivī vardhati śravaḥ | tvām āpaḥ parvatāsaś ca hinvire
Mandala 8 · Verse 9
tvāṁ viṣṇur bṛhan kṣayo mitro gṛṇāti varuṇaḥ | tvāṁ śardho madaty anu mārutam
Mandala 8 · Verse 10
tvaṁ vṛṣā janānām maṁhiṣṭha indra jajñiṣe | satrā viśvā svapatyāni dadhiṣe
Mandala 8 · Verse 11
satrā tvam puruṣṭutam̐ eko vṛtrāṇi tośase | nānya indrāt karaṇam bhūya invati
Mandala 8 · Verse 12
yad indra manmaśas tvā nānā havanta ūtaye | asmākebhir nṛbhir atrā svar jaya
Mandala 8 · Verse 13
araṁ kṣayāya no mahe viśvā rūpāṇy āviśan | indraṁ jaitrāya harṣayā śacīpatim
Mandala 8 · Verse 1
pra samrājaṁ carṣaṇīnām indraṁ stotā navyaṁ gīrbhiḥ | naraṁ nṛṣāham maṁhiṣṭham
Mandala 8 · Verse 2
yasminn ukthāni raṇyanti viśvāni ca śravasyā | apām avo na samudre
Mandala 8 · Verse 3
taṁ suṣṭutyā vivāse jyeṣṭharājam bhare kṛtnum | maho vājinaṁ sanibhyaḥ
Mandala 8 · Verse 4
yasyānūnā gabhīrā madā uravas tarutrāḥ | harṣumantaḥ śūrasātau
Mandala 8 · Verse 5
tam id dhaneṣu hiteṣv adhivākāya havante | yeṣām indras te jayanti
Mandala 8 · Verse 6
tam ic cyautnair āryanti taṁ kṛtebhiś carṣaṇayaḥ | eṣa indro varivaskṛt
Mandala 8 · Verse 7
indro brahmendra ṛṣir indraḥ purū puruhūtaḥ | mahān mahībhiḥ śacībhiḥ
Mandala 8 · Verse 8
sa stomyaḥ sa havyaḥ satyaḥ satvā tuvikūrmiḥ | ekaś cit sann abhibhūtiḥ
Mandala 8 · Verse 9
tam arkebhis taṁ sāmabhis taṁ gāyatraiś carṣaṇayaḥ | indraṁ vardhanti kṣitayaḥ
Mandala 8 · Verse 10
praṇetāraṁ vasyo acchā kartāraṁ jyotiḥ samatsu | sāsahvāṁsaṁ yudhāmitrān
Mandala 8 · Verse 11
sa naḥ papriḥ pārayāti svasti nāvā puruhūtaḥ | indro viśvā ati dviṣaḥ
Mandala 8 · Verse 12
sa tvaṁ na indra vājebhir daśasyā ca gātuyā ca | acchā ca naḥ sumnaṁ neṣi
Mandala 8 · Verse 1
ā yāhi suṣumā hi ta indra somam pibā imam | edam barhiḥ sado mama
Mandala 8 · Verse 2
ā tvā brahmayujā harī vahatām indra keśinā | upa brahmāṇi naḥ śṛṇu
Mandala 8 · Verse 3
brahmāṇas tvā vayaṁ yujā somapām indra sominaḥ | sutāvanto havāmahe
Mandala 8 · Verse 4
ā no yāhi sutāvato 'smākaṁ suṣṭutīr upa | pibā su śiprinn andhasaḥ
Mandala 8 · Verse 5
ā te siñcāmi kukṣyor anu gātrā vi dhāvatu | gṛbhāya jihvayā madhu
Mandala 8 · Verse 6
svāduṣ ṭe astu saṁsude madhumān tanve3 tava | somaḥ śam astu te hṛde
Mandala 8 · Verse 7
ayam u tvā vicarṣaṇe janīr ivābhi saṁvṛtaḥ | pra soma indra sarpatu
Mandala 8 · Verse 8
tuvigrīvo vapodaraḥ subāhur andhaso made | indro vṛtrāṇi jighnate
Mandala 8 · Verse 9
indra prehi puras tvaṁ viśvasyeśāna ojasā | vṛtrāṇi vṛtrahañ jahi
Mandala 8 · Verse 10
dīrghas te astv aṅkuśo yenā vasu prayacchasi | yajamānāya sunvate
Mandala 8 · Verse 11
ayaṁ ta indra somo nipūto adhi barhiṣi | ehīm asya dravā piba
Mandala 8 · Verse 12
śācigo śācipūjanāyaṁ raṇāya te sutaḥ | ākhaṇḍala pra hūyase
Mandala 8 · Verse 13
yas te śṛṅgavṛṣo napāt praṇapāt kuṇḍapāyyaḥ | ny asmin dadhra ā manaḥ
Mandala 8 · Verse 14
vāstoṣ pate dhruvā sthūṇāṁsatraṁ somyānām | drapso bhettā purāṁ śaśvatīnām indro munīnāṁ sakhā
Mandala 8 · Verse 15
pṛdākusānur yajato gaveṣaṇa ekaḥ sann abhi bhūyasaḥ | bhūrṇim aśvaṁ nayat tujā puro gṛbhendraṁ somasya pītaye
Mandala 8 · Verse 1
idaṁ ha nūnam eṣāṁ sumnam bhikṣeta martyaḥ | ādityānām apūrvyaṁ savīmani
Mandala 8 · Verse 2
anarvāṇo hy eṣām panthā ādityānām | adabdhāḥ santi pāyavaḥ sugevṛdhaḥ
Mandala 8 · Verse 3
tat su naḥ savitā bhago varuṇo mitro aryamā | śarma yacchantu sapratho yad īmahe
Mandala 8 · Verse 4
devebhir devy adite 'riṣṭabharmann ā gahi | smat sūribhiḥ purupriye suśarmabhiḥ
Mandala 8 · Verse 5
te hi putrāso aditer vidur dveṣāṁsi yotave | aṁhoś cid urucakrayo 'nehasaḥ
Mandala 8 · Verse 6
aditir no divā paśum aditir naktam advayāḥ | aditiḥ pātv aṁhasaḥ sadāvṛdhā
Mandala 8 · Verse 7
uta syā no divā matir aditir ūtyā gamat | sā śaṁtāti mayas karad apa sridhaḥ
Mandala 8 · Verse 8
uta tyā daivyā bhiṣajā śaṁ naḥ karato aśvinā | yuyuyātām ito rapo apa sridhaḥ
Mandala 8 · Verse 9
śam agnir agnibhiḥ karac chaṁ nas tapatu sūryaḥ | śaṁ vāto vātv arapā apa sridhaḥ
Mandala 8 · Verse 10
apāmīvām apa sridham apa sedhata durmatim | ādityāso yuyotanā no aṁhasaḥ
Mandala 8 · Verse 11
yuyotā śarum asmad ām̐ ādityāsa utāmatim | ṛdhag dveṣaḥ kṛṇuta viśvavedasaḥ
Mandala 8 · Verse 12
tat su naḥ śarma yacchatādityā yan mumocati | enasvantaṁ cid enasaḥ sudānavaḥ
Mandala 8 · Verse 13
yo naḥ kaś cid ririkṣati rakṣastvena martyaḥ | svaiḥ ṣa evai ririṣīṣṭa yur janaḥ
Mandala 8 · Verse 14
sam it tam agham aśnavad duḥśaṁsam martyaṁ ripum | yo asmatrā durhaṇāvām̐ upa dvayuḥ
Mandala 8 · Verse 15
pākatrā sthana devā hṛtsu jānītha martyam | upa dvayuṁ cādvayuṁ ca vasavaḥ
Mandala 8 · Verse 16
ā śarma parvatānām otāpāṁ vṛṇīmahe | dyāvākṣāmāre asmad rapas kṛtam
Mandala 8 · Verse 17
te no bhadreṇa śarmaṇā yuṣmākaṁ nāvā vasavaḥ | ati viśvāni duritā pipartana
Mandala 8 · Verse 18
tuce tanāya tat su no drāghīya āyur jīvase | ādityāsaḥ sumahasaḥ kṛṇotana
Mandala 8 · Verse 19
yajño hīḻo vo antara ādityā asti mṛḻata | yuṣme id vo api ṣmasi sajātye
Mandala 8 · Verse 20
bṛhad varūtham marutāṁ devaṁ trātāram aśvinā | mitram īmahe varuṇaṁ svastaye
Mandala 8 · Verse 21
aneho mitrāryaman nṛvad varuṇa śaṁsyam | trivarūtham maruto yanta naś chardiḥ
Mandala 8 · Verse 22
ye cid dhi mṛtyubandhava ādityā manavaḥ smasi | pra sū na āyur jīvase tiretana
Mandala 8 · Verse 1
taṁ gūrdhayā svarṇaraṁ devāso devam aratiṁ dadhanvire | devatrā havyam ohire
Mandala 8 · Verse 2
vibhūtarātiṁ vipra citraśociṣam agnim īḻiṣva yanturam | asya medhasya somyasya sobhare prem adhvarāya pūrvyam
Mandala 8 · Verse 3
yajiṣṭhaṁ tvā vavṛmahe devaṁ devatrā hotāram amartyam | asya yajñasya sukratum
Mandala 8 · Verse 4
ūrjo napātaṁ subhagaṁ sudīditim agniṁ śreṣṭhaśociṣam | sa no mitrasya varuṇasya so apām ā sumnaṁ yakṣate divi
Mandala 8 · Verse 5
yaḥ samidhā ya āhutī yo vedena dadāśa marto agnaye | yo namasā svadhvaraḥ
Mandala 8 · Verse 6
tasyed arvanto raṁhayanta āśavas tasya dyumnitamaṁ yaśaḥ | na tam aṁho devakṛtaṁ kutaś cana na martyakṛtaṁ naśat
Mandala 8 · Verse 7
svagnayo vo agnibhiḥ syāma sūno sahasa ūrjām pate | suvīras tvam asmayuḥ
Mandala 8 · Verse 8
praśaṁsamāno atithir na mitriyo 'gnī ratho na vedyaḥ | tve kṣemāso api santi sādhavas tvaṁ rājā rayīṇām
Mandala 8 · Verse 9
so addhā dāśvadhvaro 'gne martaḥ subhaga sa praśaṁsyaḥ | sa dhībhir astu sanitā
Mandala 8 · Verse 10
yasya tvam ūrdhvo adhvarāya tiṣṭhasi kṣayadvīraḥ sa sādhate | so arvadbhiḥ sanitā sa vipanyubhiḥ sa śūraiḥ sanitā kṛtam
Mandala 8 · Verse 11
yasyāgnir vapur gṛhe stomaṁ cano dadhīta viśvavāryaḥ | havyā vā veviṣad viṣaḥ
Mandala 8 · Verse 12
viprasya vā stuvataḥ sahaso yaho makṣūtamasya rātiṣu | avodevam uparimartyaṁ kṛdhi vaso vividuṣo vacaḥ
Mandala 8 · Verse 13
yo agniṁ havyadātibhir namobhir vā sudakṣam āvivāsati | girā vājiraśociṣam
Mandala 8 · Verse 14
samidhā yo niśitī dāśad aditiṁ dhāmabhir asya martyaḥ | viśvet sa dhībhiḥ subhago janām̐ ati dyumnair udna iva tāriṣat
Mandala 8 · Verse 15
tad agne dyumnam ā bhara yat sāsahat sadane kaṁ cid atriṇam | manyuṁ janasya dūḍhyaḥ
Mandala 8 · Verse 16
yena caṣṭe varuṇo mitro aryamā yena nāsatyā bhagaḥ | vayaṁ tat te śavasā gātuvittamā indratvotā vidhemahi
Mandala 8 · Verse 17
te ghed agne svādhyo3 ye tvā vipra nidadhire nṛcakṣasam | viprāso deva sukratum
Mandala 8 · Verse 18
ta id vediṁ subhaga ta āhutiṁ te sotuṁ cakrire divi | ta id vājebhir jigyur mahad dhanaṁ ye tve kāmaṁ nyerire
Mandala 8 · Verse 19
bhadro no agnir āhuto bhadrā rātiḥ subhaga bhadro adhvaraḥ | bhadrā uta praśastayaḥ
Mandala 8 · Verse 20
bhadram manaḥ kṛṇuṣva vṛtratūrye yenā samatsu sāsahaḥ | ava sthirā tanuhi bhūri śardhatāṁ vanemā te abhiṣṭibhiḥ
Mandala 8 · Verse 21
īḻe girā manurhitaṁ yaṁ devā dūtam aratiṁ nyerire | yajiṣṭhaṁ havyavāhanam
Mandala 8 · Verse 22
tigmajambhāya taruṇāya rājate prayo gāyasy agnaye | yaḥ piṁśate sūnṛtābhiḥ suvīryam agnir ghṛtebhir āhutaḥ
Mandala 8 · Verse 23
yadī ghṛtebhir āhuto vāśīm agnir bharata uc cāva ca | asura iva nirṇijam
Mandala 8 · Verse 24
yo havyāny airayatā manurhito deva āsā sugandhinā | vivāsate vāryāṇi svadhvaro hotā devo amartyaḥ
Mandala 8 · Verse 25
yad agne martyas tvaṁ syām aham mitramaho amartyaḥ | sahasaḥ sūnav āhuta
Mandala 8 · Verse 26
na tvā rāsīyābhiśastaye vaso na pāpatvāya santya | na me stotāmatīvā na durhitaḥ syād agne na pāpayā
Mandala 8 · Verse 27
pitur na putraḥ subhṛto duroṇa ā devām̐ etu pra ṇo haviḥ
Mandala 8 · Verse 28
tavāham agna ūtibhir nediṣṭhābhiḥ saceya joṣam ā vaso | sadā devasya martyaḥ
Mandala 8 · Verse 29
tava kratvā saneyaṁ tava rātibhir agne tava praśastibhiḥ | tvām id āhuḥ pramatiṁ vaso mamāgne harṣasva dātave
Mandala 8 · Verse 30
pra so agne tavotibhiḥ suvīrābhis tirate vājabharmabhiḥ | yasya tvaṁ sakhyam āvaraḥ
Mandala 8 · Verse 31
tava drapso nīlavān vāśa ṛtviya indhānaḥ siṣṇav ā dade | tvam mahīnām uṣasām asi priyaḥ kṣapo vastuṣu rājasi
Mandala 8 · Verse 32
tam āganma sobharayaḥ sahasramuṣkaṁ svabhiṣṭim avase | samrājaṁ trāsadasyavam
Mandala 8 · Verse 33
yasya te agne anye agnaya upakṣito vayā iva | vipo na dyumnā ni yuve janānāṁ tava kṣatrāṇi vardhayan
Mandala 8 · Verse 34
yam ādityāso adruhaḥ pāraṁ nayatha martyam | maghonāṁ viśveṣāṁ sudānavaḥ
Mandala 8 · Verse 35
yūyaṁ rājānaḥ kaṁ cic carṣaṇīsahaḥ kṣayantam mānuṣām̐ anu | vayaṁ te vo varuṇa mitrāryaman syāmed ṛtasya rathyaḥ
Mandala 8 · Verse 36
adān me paurukutsyaḥ pañcāśataṁ trasadasyur vadhūnām | maṁhiṣṭho aryaḥ satpatiḥ
Mandala 8 · Verse 37
uta me prayiyor vayiyoḥ suvāstvā adhi tugvani | tisṝṇāṁ saptatīnāṁ śyāvaḥ praṇetā bhuvad vasur diyānām patiḥ
Mandala 8 · Verse 1
ā gantā mā riṣaṇyata prasthāvāno māpa sthātā samanyavaḥ | sthirā cin namayiṣṇavaḥ
Mandala 8 · Verse 2
vīḻupavibhir maruta ṛbhukṣaṇa ā rudrāsaḥ sudītibhiḥ | iṣā no adyā gatā puruspṛho yajñam ā sobharīyavaḥ
Mandala 8 · Verse 3
vidmā hi rudriyāṇāṁ śuṣmam ugram marutāṁ śimīvatām | viṣṇor eṣasya mīḻhuṣām
Mandala 8 · Verse 4
vi dvīpāni pāpatan tiṣṭhad ducchunobhe yujanta rodasī | pra dhanvāny airata śubhrakhādayo yad ejatha svabhānavaḥ
Mandala 8 · Verse 5
acyutā cid vo ajmann ā nānadati parvatāso vanaspatiḥ | bhūmir yāmeṣu rejate
Mandala 8 · Verse 6
amāya vo maruto yātave dyaur jihīta uttarā bṛhat | yatrā naro dediśate tanūṣv ā tvakṣāṁsi bāhvojasaḥ
Mandala 8 · Verse 7
svadhām anu śriyaṁ naro mahi tveṣā amavanto vṛṣapsavaḥ | vahante ahrutapsavaḥ
Mandala 8 · Verse 8
gobhir vāṇo ajyate sobharīṇāṁ rathe kośe hiraṇyaye | gobandhavaḥ sujātāsa iṣe bhuje mahānto naḥ sparase nu
Mandala 8 · Verse 9
prati vo vṛṣadañjayo vṛṣṇe śardhāya mārutāya bharadhvam | havyā vṛṣaprayāvṇe
Mandala 8 · Verse 10
vṛṣaṇaśvena maruto vṛṣapsunā rathena vṛṣanābhinā | ā śyenāso na pakṣiṇo vṛthā naro havyā no vītaye gata
Mandala 8 · Verse 11
samānam añjy eṣāṁ vi bhrājante rukmāso adhi bāhuṣu | davidyutaty ṛṣṭayaḥ
Mandala 8 · Verse 12
ta ugrāso vṛṣaṇa ugrabāhavo nakiṣ ṭanūṣu yetire | sthirā dhanvāny āyudhā ratheṣu vo 'nīkeṣv adhi śriyaḥ
Mandala 8 · Verse 13
yeṣām arṇo na sapratho nāma tveṣaṁ śaśvatām ekam id bhuje | vayo na pitryaṁ sahaḥ
Mandala 8 · Verse 14
tān vandasva marutas tām̐ upa stuhi teṣāṁ hi dhunīnām | arāṇāṁ na caramas tad eṣāṁ dānā mahnā tad eṣām
Mandala 8 · Verse 15
subhagaḥ sa va ūtiṣv āsa pūrvāsu maruto vyuṣṭiṣu | yo vā nūnam utāsati
Mandala 8 · Verse 16
yasya vā yūyam prati vājino nara ā havyā vītaye gatha | abhi ṣa dyumnair uta vājasātibhiḥ sumnā vo dhūtayo naśat
Mandala 8 · Verse 17
yathā rudrasya sūnavo divo vaśanty asurasya vedhasaḥ | yuvānas tathed asat
Mandala 8 · Verse 18
ye cārhanti marutaḥ sudānavaḥ sman mīḻhuṣaś caranti ye | ataś cid ā na upa vasyasā hṛdā yuvāna ā vavṛdhvam
Mandala 8 · Verse 19
yūna ū ṣu naviṣṭhayā vṛṣṇaḥ pāvakām̐ abhi sobhare girā | gāya gā iva carkṛṣat
Mandala 8 · Verse 20
sāhā ye santi muṣṭiheva havyo viśvāsu pṛtsu hotṛṣu | vṛṣṇaś candrān na suśravastamān girā vandasva maruto aha
Mandala 8 · Verse 21
gāvaś cid ghā samanyavaḥ sajātyena marutaḥ sabandhavaḥ | rihate kakubho mithaḥ
Mandala 8 · Verse 22
martaś cid vo nṛtavo rukmavakṣasa upa bhrātṛtvam āyati | adhi no gāta marutaḥ sadā hi va āpitvam asti nidhruvi
Mandala 8 · Verse 23
maruto mārutasya na ā bheṣajasya vahatā sudānavaḥ | yūyaṁ sakhāyaḥ saptayaḥ
Mandala 8 · Verse 24
yābhiḥ sindhum avatha yābhis tūrvatha yābhir daśasyathā krivim | mayo no bhūtotibhir mayobhuvaḥ śivābhir asacadviṣaḥ
Mandala 8 · Verse 25
yat sindhau yad asiknyāṁ yat samudreṣu marutaḥ subarhiṣaḥ | yat parvateṣu bheṣajam
Mandala 8 · Verse 26
viśvam paśyanto bibhṛthā tanūṣv ā tenā no adhi vocata | kṣamā rapo maruta āturasya na iṣkartā vihrutam punaḥ
Mandala 8 · Verse 1
vayam u tvām apūrvya sthūraṁ na kac cid bharanto 'vasyavaḥ | vāje citraṁ havāmahe
Mandala 8 · Verse 2
upa tvā karmann ūtaye sa no yuvograś cakrāma yo dhṛṣat | tvām id dhy avitāraṁ vavṛmahe sakhāya indra sānasim
Mandala 8 · Verse 3
ā yāhīma indavo 'śvapate gopata urvarāpate | somaṁ somapate piba
Mandala 8 · Verse 4
vayaṁ hi tvā bandhumantam abandhavo viprāsa indra yemima | yā te dhāmāni vṛṣabha tebhir ā gahi viśvebhiḥ somapītaye
Mandala 8 · Verse 5
sīdantas te vayo yathā gośrīte madhau madire vivakṣaṇe | abhi tvām indra nonumaḥ
Mandala 8 · Verse 6
acchā ca tvainā namasā vadāmasi kim muhuś cid vi dīdhayaḥ | santi kāmāso harivo dadiṣ ṭvaṁ smo vayaṁ santi no dhiyaḥ
Mandala 8 · Verse 7
nūtnā id indra te vayam ūtī abhūma nahi nū te adrivaḥ | vidmā purā parīṇasaḥ
Mandala 8 · Verse 8
vidmā sakhitvam uta śūra bhojya1m ā te tā vajrinn īmahe | uto samasminn ā śiśīhi no vaso vāje suśipra gomati
Mandala 8 · Verse 9
yo na idam-idam purā pra vasya ānināya tam u vaḥ stuṣe | sakhāya indram ūtaye
Mandala 8 · Verse 10
haryaśvaṁ satpatiṁ carṣaṇīsahaṁ sa hi ṣmā yo amandata | ā tu naḥ sa vayati gavyam aśvyaṁ stotṛbhyo maghavā śatam
Mandala 8 · Verse 11
tvayā ha svid yujā vayam prati śvasantaṁ vṛṣabha bruvīmahi | saṁsthe janasya gomataḥ
Mandala 8 · Verse 12
jayema kāre puruhūta kāriṇo 'bhi tiṣṭhema dūḍhyaḥ | nṛbhir vṛtraṁ hanyāma śūśuyāma cāver indra pra ṇo dhiyaḥ
Mandala 8 · Verse 13
abhrātṛvyo anā tvam anāpir indra januṣā sanād asi | yudhed āpitvam icchase
Mandala 8 · Verse 14
nakī revantaṁ sakhyāya vindase pīyanti te surāśvaḥ | yadā kṛṇoṣi nadanuṁ sam ūhasy ād it piteva hūyase
Mandala 8 · Verse 15
mā te amājuro yathā mūrāsa indra sakhye tvāvataḥ | ni ṣadāma sacā sute
Mandala 8 · Verse 16
mā te godatra nir arāma rādhasa indra mā te gṛhāmahi | dṛḻhā cid aryaḥ pra mṛśābhy ā bhara na te dāmāna ādabhe
Mandala 8 · Verse 17
indro vā ghed iyan maghaṁ sarasvatī vā subhagā dadir vasu | tvaṁ vā citra dāśuṣe
Mandala 8 · Verse 18
citra id rājā rājakā id anyake yake sarasvatīm anu | parjanya iva tatanad dhi vṛṣṭyā sahasram ayutā dadat
Mandala 8 · Verse 1
o tyam ahva ā ratham adyā daṁsiṣṭham ūtaye | yam aśvinā suhavā rudravartanī ā sūryāyai tasthathuḥ
Mandala 8 · Verse 2
pūrvāyuṣaṁ suhavam puruspṛham bhujyuṁ vājeṣu pūrvyam | sacanāvantaṁ sumatibhiḥ sobhare vidveṣasam anehasam
Mandala 8 · Verse 3
iha tyā purubhūtamā devā namobhir aśvinā | arvācīnā sv avase karāmahe gantārā dāśuṣo gṛham
Mandala 8 · Verse 4
yuvo rathasya pari cakram īyata īrmānyad vām iṣaṇyati | asmām̐ acchā sumatir vāṁ śubhas patī ā dhenur iva dhāvatu
Mandala 8 · Verse 5
ratho yo vāṁ trivandhuro hiraṇyābhīśur aśvinā | pari dyāvāpṛthivī bhūṣati śrutas tena nāsatyā gatam
Mandala 8 · Verse 6
daśasyantā manave pūrvyaṁ divi yavaṁ vṛkeṇa karṣathaḥ | tā vām adya sumatibhiḥ śubhas patī aśvinā pra stuvīmahi
Mandala 8 · Verse 7
upa no vājinīvasū yātam ṛtasya pathibhiḥ | yebhis tṛkṣiṁ vṛṣaṇā trāsadasyavam mahe kṣatrāya jinvathaḥ
Mandala 8 · Verse 8
ayaṁ vām adribhiḥ sutaḥ somo narā vṛṣaṇvasū | ā yātaṁ somapītaye pibataṁ dāśuṣo gṛhe
Mandala 8 · Verse 9
ā hi ruhatam aśvinā rathe kośe hiraṇyaye vṛṣaṇvasū | yuñjāthām pīvarīr iṣaḥ
Mandala 8 · Verse 10
yābhiḥ paktham avatho yābhir adhriguṁ yābhir babhruṁ vijoṣasam | tābhir no makṣū tūyam aśvinā gatam bhiṣajyataṁ yad āturam
Mandala 8 · Verse 11
yad adhrigāvo adhrigū idā cid ahno aśvinā havāmahe | vayaṁ gīrbhir vipanyavaḥ
Mandala 8 · Verse 12
tābhir ā yātaṁ vṛṣaṇopa me havaṁ viśvapsuṁ viśvavāryam | iṣā maṁhiṣṭhā purubhūtamā narā yābhiḥ kriviṁ vāvṛdhus tābhir ā gatam
Mandala 8 · Verse 13
tāv idā cid ahānāṁ tāv aśvinā vandamāna upa bruve | tā u namobhir īmahe
🔊 Divine Listen
💬 WhatsApp
Mandala 8 · Verse 14
tāv id doṣā tā uṣasi śubhas patī tā yāman rudravartanī | mā no martāya ripave vājinīvasū paro rudrāv ati khyatam
Mandala 8 · Verse 15
ā sugmyāya sugmyam prātā rathenāśvinā vā sakṣaṇī | huve piteva sobharī
Mandala 8 · Verse 16
manojavasā vṛṣaṇā madacyutā makṣuṁgamābhir ūtibhiḥ | ārāttāc cid bhūtam asme avase pūrvībhiḥ purubhojasā
Mandala 8 · Verse 17
ā no aśvāvad aśvinā vartir yāsiṣṭam madhupātamā narā | gomad dasrā hiraṇyavat
Mandala 8 · Verse 18
suprāvargaṁ suvīryaṁ suṣṭhu vāryam anādhṛṣṭaṁ rakṣasvinā | asminn ā vām āyāne vājinīvasū viśvā vāmāni dhīmahi
Mandala 8 · Verse 1
īḻiṣvā hi pratīvya1ṁ yajasva jātavedasam | cariṣṇudhūmam agṛbhītaśociṣam
Mandala 8 · Verse 2
dāmānaṁ viśvacarṣaṇe 'gniṁ viśvamano girā | uta stuṣe viṣpardhaso rathānām
Mandala 8 · Verse 3
yeṣām ābādha ṛgmiya iṣaḥ pṛkṣaś ca nigrabhe | upavidā vahnir vindate vasu
Mandala 8 · Verse 4
ud asya śocir asthād dīdiyuṣo vy a1jaram | tapurjambhasya sudyuto gaṇaśriyaḥ
Mandala 8 · Verse 5
ud u tiṣṭha svadhvara stavāno devyā kṛpā | abhikhyā bhāsā bṛhatā śuśukvaniḥ
Mandala 8 · Verse 6
agne yāhi suśastibhir havyā juhvāna ānuṣak | yathā dūto babhūtha havyavāhanaḥ
Mandala 8 · Verse 7
agniṁ vaḥ pūrvyaṁ huve hotāraṁ carṣaṇīnām | tam ayā vācā gṛṇe tam u vaḥ stuṣe
Mandala 8 · Verse 8
yajñebhir adbhutakratuṁ yaṁ kṛpā sūdayanta it | mitraṁ na jane sudhitam ṛtāvani
Mandala 8 · Verse 9
ṛtāvānam ṛtāyavo yajñasya sādhanaṁ girā | upo enaṁ jujuṣur namasas pade
Mandala 8 · Verse 10
acchā no aṅgirastamaṁ yajñāso yantu saṁyataḥ | hotā yo asti vikṣv ā yaśastamaḥ
Mandala 8 · Verse 11
agne tava tye ajarendhānāso bṛhad bhāḥ | aśvā iva vṛṣaṇas taviṣīyavaḥ
Mandala 8 · Verse 12
sa tvaṁ na ūrjām pate rayiṁ rāsva suvīryam | prāva nas toke tanaye samatsv ā
Mandala 8 · Verse 13
yad vā u viśpatiḥ śitaḥ suprīto manuṣo viśi | viśved agniḥ prati rakṣāṁsi sedhati
Mandala 8 · Verse 14
śruṣṭy agne navasya me stomasya vīra viśpate | ni māyinas tapuṣā rakṣaso daha
Mandala 8 · Verse 15
na tasya māyayā cana ripur īśīta martyaḥ | yo agnaye dadāśa havyadātibhiḥ
Mandala 8 · Verse 16
vyaśvas tvā vasuvidam ukṣaṇyur aprīṇād ṛṣiḥ | maho rāye tam u tvā sam idhīmahi
Mandala 8 · Verse 17
uśanā kāvyas tvā ni hotāram asādayat | āyajiṁ tvā manave jātavedasam
Mandala 8 · Verse 18
viśve hi tvā sajoṣaso devāso dūtam akrata | śruṣṭī deva prathamo yajñiyo bhuvaḥ
Mandala 8 · Verse 19
imaṁ ghā vīro amṛtaṁ dūtaṁ kṛṇvīta martyaḥ | pāvakaṁ kṛṣṇavartaniṁ vihāyasam
Mandala 8 · Verse 20
taṁ huvema yatasrucaḥ subhāsaṁ śukraśociṣam | viśām agnim ajaram pratnam īḍyam
Mandala 8 · Verse 21
yo asmai havyadātibhir āhutim marto 'vidhat | bhūri poṣaṁ sa dhatte vīravad yaśaḥ
Mandala 8 · Verse 22
prathamaṁ jātavedasam agniṁ yajñeṣu pūrvyam | prati srug eti namasā haviṣmatī
Mandala 8 · Verse 23
ābhir vidhemāgnaye jyeṣṭhābhir vyaśvavat | maṁhiṣṭhābhir matibhiḥ śukraśociṣe
Mandala 8 · Verse 24
nūnam arca vihāyase stomebhiḥ sthūrayūpavat | ṛṣe vaiyaśva damyāyāgnaye
Mandala 8 · Verse 25
atithim mānuṣāṇāṁ sūnuṁ vanaspatīnām | viprā agnim avase pratnam īḻate
Mandala 8 · Verse 26
maho viśvām̐ abhi ṣato3 'bhi havyāni mānuṣā | agne ni ṣatsi namasādhi barhiṣi
Mandala 8 · Verse 27
vaṁsvā no vāryā puru vaṁsva rāyaḥ puruspṛhaḥ | suvīryasya prajāvato yaśasvataḥ
Mandala 8 · Verse 28
tvaṁ varo suṣāmṇe 'gne janāya codaya | sadā vaso rātiṁ yaviṣṭha śaśvate
Mandala 8 · Verse 29
tvaṁ hi supratūr asi tvaṁ no gomatīr iṣaḥ | maho rāyaḥ sātim agne apā vṛdhi
Mandala 8 · Verse 30
agne tvaṁ yaśā asy ā mitrāvaruṇā vaha | ṛtāvānā samrājā pūtadakṣasā
Mandala 8 · Verse 1
sakhāya ā śiṣāmahi brahmendrāya vajriṇe | stuṣa ū ṣu vo nṛtamāya dhṛṣṇave
Mandala 8 · Verse 2
śavasā hy asi śruto vṛtrahatyena vṛtrahā | maghair maghono ati śūra dāśasi
Mandala 8 · Verse 3
sa naḥ stavāna ā bhara rayiṁ citraśravastamam | nireke cid yo harivo vasur dadiḥ
Mandala 8 · Verse 4
ā nirekam uta priyam indra darṣi janānām | dhṛṣatā dhṛṣṇo stavamāna ā bhara
Mandala 8 · Verse 5
na te savyaṁ na dakṣiṇaṁ hastaṁ varanta āmuraḥ | na paribādho harivo gaviṣṭiṣu
Mandala 8 · Verse 6
ā tvā gobhir iva vrajaṁ gīrbhir ṛṇomy adrivaḥ | ā smā kāmaṁ jaritur ā manaḥ pṛṇa
Mandala 8 · Verse 7
viśvāni viśvamanaso dhiyā no vṛtrahantama | ugra praṇetar adhi ṣū vaso gahi
Mandala 8 · Verse 8
vayaṁ te asya vṛtrahan vidyāma śūra navyasaḥ | vasoḥ spārhasya puruhūta rādhasaḥ
Mandala 8 · Verse 9
indra yathā hy asti te 'parītaṁ nṛto śavaḥ | amṛktā rātiḥ puruhūta dāśuṣe
Mandala 8 · Verse 10
ā vṛṣasva mahāmaha mahe nṛtama rādhase | dṛḻhaś cid dṛhya maghavan maghattaye
Mandala 8 · Verse 11
nū anyatrā cid adrivas tvan no jagmur āśasaḥ | maghavañ chagdhi tava tan na ūtibhiḥ
Mandala 8 · Verse 12
nahy a1ṅga nṛto tvad anyaṁ vindāmi rādhase | rāye dyumnāya śavase ca girvaṇaḥ
Mandala 8 · Verse 13
endum indrāya siñcata pibāti somyam madhu | pra rādhasā codayāte mahitvanā
Mandala 8 · Verse 14
upo harīṇām patiṁ dakṣam pṛñcantam abravam | nūnaṁ śrudhi stuvato aśvyasya
Mandala 8 · Verse 15
nahy a1ṅga purā cana jajñe vīrataras tvat | nakī rāyā naivathā na bhandanā
Mandala 8 · Verse 16
ed u madhvo madintaraṁ siñca vādhvaryo andhasaḥ | evā hi vīraḥ stavate sadāvṛdhaḥ
Mandala 8 · Verse 17
indra sthātar harīṇāṁ nakiṣ ṭe pūrvyastutim | ud ānaṁśa śavasā na bhandanā
Mandala 8 · Verse 18
taṁ vo vājānām patim ahūmahi śravasyavaḥ | aprāyubhir yajñebhir vāvṛdhenyam
Mandala 8 · Verse 19
eto nv indraṁ stavāma sakhāyaḥ stomyaṁ naram | kṛṣṭīr yo viśvā abhy asty eka it
Mandala 8 · Verse 20
agorudhāya gaviṣe dyukṣāya dasmyaṁ vacaḥ | ghṛtāt svādīyo madhunaś ca vocata
Mandala 8 · Verse 21
yasyāmitāni vīryā3 na rādhaḥ paryetave | jyotir na viśvam abhy asti dakṣiṇā
Mandala 8 · Verse 22
stuhīndraṁ vyaśvavad anūrmiṁ vājinaṁ yamam | aryo gayam maṁhamānaṁ vi dāśuṣe
Mandala 8 · Verse 23
evā nūnam upa stuhi vaiyaśva daśamaṁ navam | suvidvāṁsaṁ carkṛtyaṁ caraṇīnām
Mandala 8 · Verse 24
vetthā hi nirṛtīnāṁ vajrahasta parivṛjam | ahar-ahaḥ śundhyuḥ paripadām iva
Mandala 8 · Verse 25
tad indrāva ā bhara yenā daṁsiṣṭha kṛtvane | dvitā kutsāya śiśnatho ni codaya
Mandala 8 · Verse 26
tam u tvā nūnam īmahe navyaṁ daṁsiṣṭha sanyase | sa tvaṁ no viśvā abhimātīḥ sakṣaṇiḥ
Mandala 8 · Verse 27
ya ṛkṣād aṁhaso mucad yo vāryāt sapta sindhuṣu | vadhar dāsasya tuvinṛmṇa nīnamaḥ
Mandala 8 · Verse 28
yathā varo suṣāmṇe sanibhya āvaho rayim | vyaśvebhyaḥ subhage vājinīvati
Mandala 8 · Verse 29
ā nāryasya dakṣiṇā vyaśvām̐ etu sominaḥ | sthūraṁ ca rādhaḥ śatavat sahasravat
Mandala 8 · Verse 30
yat tvā pṛcchād ījānaḥ kuhayā kuhayākṛte | eṣo apaśrito valo gomatīm ava tiṣṭhati
--- Previous Pages - Next Page ---
